Pahāti sabab kitab Injil inin

Dem kitab Injil niya' me' libru magseddili-seddili. Tagna' niya' ampat sulat magaka sabab si Isa Almasi duk sabab me' hinangannen duk me' panolo'nen katu'une si dunyahin.

Ubus niya' dambuwa' sulat magaka sabab me' hinangan me' tindeg si Isahin pagubus ne si Isa hap pī hap surga'. Inakahan isab la'i bang sa'ingge siye tinabangan we' Niyawa Tuhanin si hinangden duk bang sa'ingge palatag aka-aka mahāp sabab Isa Almasihin si me' kalahatan.

Ubus niya' isab duwempuk-dambuwa' sulat pinasampay si me' masandel pu si Isa si me' kalahat-lahatanin. Tinolo'an siye diyalem me' sulat inin supaya ngabasag sandelde pu si Isahin duk supaya pasōng tasabutde panolo' si Isahin duk supaya isab kata'uhande bang sa'ingge subey kawul-pi'ilden.

Si tuggu niya' pe dambuwa' sulat magaka bang ine ma'umantag si pasōnganin.

Kēmon me' sulat dem kitab Injilin sinulat we' me' tindeg si Isa sinduwehin. Inurungan siye pikilan duk kata'u we' Tuhanin pagsulatde inin hangkan kēmon sinulatden me' bissā Tuhanin te'ed. Tasulat tu'u dem kitab Injil (2. Petros 1:21), pina'in, "Me' bissā Tuhan dem kitabin duma'in amban pikilan manusiya'. Saguwa' me' a'a ginuna Tuhan magpalata' lapalnen, pagbaya'an we' Niyawa Tuhanin hangkan tabissāde duk sulatde me' bissā Tuhanin."

Duk sinulat isab tu'u we' hāp bang hapalte dem kitabin duk we' niya' kagunahanne para si kite duk pamanolo' si me' sawe'ten. Sinulat we' si Paul pu si Timoteo sa inin (2. Timoteo 3:16-17), "Kēmon tasulat dem kitabin pinasulat we' Tuhanin duk niya' kagunahanne bang magtolo' kite tolo' mabennalin duk bang tolo'ante me' bakas kapagdusehin, duk bang pamabentelte me' a'a maniya' hinangande ga'i tumu'unin, duk pamanolo'te me' addat mahāpin, supaya a'a suku' si Tuhanin jukup kapandeyannen duk panyap iye maghinang sasuku hinangan mahāpin."

Hangkan hep hāp te'ed bang magtuyu' kite maghapal dem kitabin kahaba' ellew supaya kata'uhante bang ine kinabaya'an Tuhan subey hininangten duk kite ta'u te'ed nuhut iye.

Kitab Injilin bang tagna' sinulat, sinulat si bissāhan Girik. Bissāhan inin tasabut we' me' a'a ma'ekka si me' kalahatan masaley. Tiya' me' ayat amban kitab Injil si bissāhan Girik. Sa inin bantuknen.

καὶ ἔχομεν βεβαιότερον τὸν προφητικὸν λόγον, ᾧ καλῶς ποιεῖτε προσέχοντες ὡς λύχνῳ φαίνοντι ἐν αὐχμηρῷ τόπῳ, ἕως οὗ ἡμέρα διαυγάσῃ καὶ φωσφόρος ἀνατείλῃ ἐν ταῖς καρδίαις ὑμῶν, τοῦτο πρῶτον γινώσκοντες ὅτι πᾶσα προφητεία γραφῆς ἰδίας ἐπιλύσεως οὐ γίνεται· οὐ γὰρ θελήματι ἀνθρώπου ἠνέχθη προφητεία ποτέ, ἀλλὰ ὑπὸ πνεύματος ἁγίου φερόμενοι ἐλάλησαν ἀπὸ θεοῦ ἄνθρωποι.

Saguwa' bang kite bi kuwe'itu kulang kite bi makasabut bissā Girik. Duk sa'ingge pangata'ute kinabaya'an Tuhanin bang sinulat hadja si bissāhan ga'i tasabutte bi? Hangkan ilinda ne kitab Injilin si bissāhan Yakan.

Pahatul-hatul te'ed kami pamalinda kami ininsi bissāhan Yakan, supaya hāti me' bissā dem kitab Injil iniyakan inin, sali' te'ed duk sinulat tagna' si bissāhan Girikin.

Si kēmon me' sulat inin niya' dahu' pahāti. Inakahan la'i bang sine manulatin, bang sine sinulatanin duk bang ine sinulat mala'ihin, atawa bang ine jānnen hangkan iyan sinulat. Me' a'a sinulatan tagna'in, seddili manamal addatden amban kite bi duk seddili isab āgamaden duk sampay bantuk lahatden. Hangkan pinahātihan kuwe'ahat duk mura tasabut me' sinulat dem kitabin.

Si bukut kitab inin niya' isab me' bissā sinduwe ilista la'i duk pinahāti. Bang upama niya' takasuwa'nu bissā ga'i tantu tasabutnu hātinen, pihahun dahu' si bukut bang ilista ke la'i duk batsahun hātinen.

Niya' isab mapa me' lahat tina'at dem kitab inin supaya kata'uhannu bang antag me' lahat miya'an duk me' puweblonen.

Niya' isab me' lambahan taga patta' binettad si bukut kitab inin duk mura tasabutnu me' addat me' a'a masaley, bang sa'ingge semmekden, luma'den, me' hayepden duk buwa' kayuden duk me' sinduwehin pe.

Hatu ulali' ne kew bang we'ey me' bissā sinduwe sinulatin seddili amban pana'atnu si lahatnun. Kata'uhannu du we' bisan kite bi kēmon maginiyakan, magseddili-seddili du isab pana'atten bi. Niya' magpa'in "pili", niya' isab magpa'in "pī”, niya' magpa'in "seddili" duk niya' "seddī". Niya' isab magpa'in "kata'uhan" duk niya' magpa'in "kete'uhan". Duk niya' pe ekka bissā sa miya'an. Tu'u dem libru inin sinulat hadja me' bissāhin kuwe' pana'at ma'ekkahin, saguwa' bang kew matsa, makajari ta'atnu kuwe' katagamannun.

Karayaw urungan Tuhanin kew kata'u bang batsanu dem kitab inin duk karayaw pakitehanne kew bang sa'ingge hadje lasane duk ase'ne si ka'uhin duk si kēmon manusiya'in.

 

Wassalam