Tiggel ne ku mabaya', we' niya' magpahāti si me' a'a Yakanin dem haradiyu sabab me' bakas tahinang Tuhan para si kitehin bi me' manusiya'in duk bang sa'ingge hadje lasanen si manusiya'in.
Ubus, tahun 2007 niya' takaleku sabab dembuwa' programa para si haradiyu bu magtewwa' te'ed duk bakas pinihakun. Me' lesson dem programa inin tagna' sinulat para si me' a'a bangsa Wolof, lahatden si Senegal si West Africa, bu sinulat si bahasade. Sinulat me' lessonin we' dembuwa' lella inēnan Mr. Paul D. Bramsen bu tinabangan iye we' me' bagayne. Magsukul ku si iye, pegge' ngatu iye ngurungan aku me' lesson inin si bissā Inglis duk urunganne ku isab permiso ngalinda me' lesson inin si bissā Yakan.
Kemuwe February 2010 pinahelling me' lesson inin mintedde de simana si station DXAS si Zamboanga City.
Supaya me' a'ahin makajari isab matsa me' lessonin duk magistadi te'ed, pinapī ne dem libru kuwe'itu bu binettad isab tu'u.
Kemuwe metu'uhin pina'in we' pinakita'u we' Tuhanin kabaya'annen dem ampat Kitab – dem Kitab Tawrat, Kitab Jabur, Kitab Injil, duk Kitab Qur'an. Saguwa' ga' niya' dapat me' Yakanin pegge' ga' niya' takalede supaya tasabutde Aka-aka Mahāp amban Tuhanin sa sinulat dem Kitab Tawratin, Kitab Jabur duk Kitab Injilin. Hangkan dem me' lesson inin makajari ta'ayate bang ine lapal Tuhan pinasampayne si me' manusiya'in palabey amban me' kanabihan masaley. Sinulat tu'u pinagturul-turul kemuwe tagna' pinapanjari dunyahin taman ellew kiyamat.
Inēnan programa inin “Lānin duk a'ahin manjari bentel si matahan Tuhan”. Tu'u si programa inin, pesōng du kata'uten sabab Tuhanin duk Lapalnen. Kata'uhannu ke bang sa'ingge Tuhanin? Atawa bang amban nakura' seyitanin? Kata'uhannu bang ine jānnen hangkan pinapanjari manusiya'in we' Tuhanin? Atawa bang sa'ingge dusehin pa'asek dem dunya – bu tagna' du pinapanjari we' Tuhanin hāp hadja? Bakas tabatsanu ke istori meke'ulali' sabab Nabi Nu duk laseyin? Kata'uhannu te'ed me' sinulat we' me' nabihin? Kata'uhannu bang we'ey Nabi Ibrahim inēnan Bagay Tuhanin?
Palabey ne ibuhan tahun missā Nabi Ayyub, tilewne, pa'inne, “Sa'ingge makajari duk a'ahin bentel si matahan Tuhan?” (Ayyub 9:2) Kata'uhannu bang ine sambung Tuhanin pu si Nabi Ayyub? Kata'uhannu ke bang sa'ingge kew makajari bentel si matahan Tuhanin? Bang mabaya' kata'uhannu sambung Tuhanin si panilew inin duk ekka panilew seddili, da'akkte kew pakale si programa Lānin duk a'ahin manjari bentel, duk magistadi kew dem libru inin. To'o, Lapal Tuhanin lalem, hāp, meke'ulali', ellum, duk balakatan. Duk niya' pe: ga' niya' tinapukan we' Lapal Tuhanin. Pakitehanne te'ed bang sa'ingge manusiya'in. Pina'in dem Kitab: “Ga' niya' bisan ine katapukante amban Tuhan pegge' kēmon pinapanjarinen tampal si pagmatahanne. Duk si pesōngan kēmon kite bi subey paharap si iye magbennal sabab kēmon kahinanganten bi.” (Hibrani 4:13)
Na, karayaw katolo'an ka'am duk inurungan ledjiki' sasangbi magistadi dem libru inin!
Ekka me' a'a magseddili-seddili nabangan aku magmemes libru inin. Niya' nabang maglinda duk maghatul me' lessonin, niya' seddili nabangan aku magformat si computer duk seddili pe magtypeset, duk magprint, duk magbettad tu'u. Magsukul ku si siye kēmon! Karayaw iledjiki'an isab siye!
Amban dembuwa' bagay me' Yakanin
Wassalam
